Om stillinga

Om stillinga
Ved Institutt for språk og litteratur ved Høgskulen i Volda er det ledig ei 3-årig stipendiatstilling (ph.d.). Stillinga er knytt til forskingsprosjektet Multilectal Individual Differences in Reading (MInDReading): Neurocognitive and Behavioral Effects of Dialect Exposure on Literacy Development, finansiert av Noregs forskingsråd i perioden august 2026-juli 2030. Ph.d.-prosjektet (avhandlingstema og studieplan) skal utviklast i tett samarbeid med prosjektleiaren, innanfor ramma av MInDReading.

Planlagd oppstart: september 2026 (oppstart kan avtalast nærare).

Den som blir tilsett, blir del av eit aktivt forskingsmiljø i eksperimentell lingvistikk/psykolingvistikk og blir knytt til ph.d.-programmet Utdanning, språk og kultur ved Høgskulen i Volda.

Kvalifikasjonar

Søkjarar må ha:
• mastergrad (eller tilsvarande) i lingvistikk eller nærliggjande fagområde (t.d. psykologi, kognitiv vitskap). Dersom graden vert fullført i vårsemesteret 2026, skal vitnemål ettersendast så snart som råd
• svært gode ferdigheiter i munnleg og skriftleg engelsk. Nordiske søkjarar kan dokumentere dette ved å leggje ved vitnemål frå vidaregåande skule.
• dokumentert erfaring med og interesse for eksperimentelle og/eller kvantitative tilnærmingar til språkprosessering og individuelle skilnader

Ønskt kompetanse
Vi ser særleg etter søkjarar som kan vise til eitt eller fleire av følgjande:
• erfaring med R (databehandling, visualisering, statistisk modellering)
• erfaring med eksperimentelle metodar (t.d. blikksporing, EEG og ERP-analysar, sjølvstyrt lesing, taleproduksjon)
• erfaring frå forsking på fleirspråklegheit, multilektalitet/bidialektalitet eller språkleg variasjon
• erfaring med utforming og validering av spørjeskjema eller anna målearbeid
• kompetanse i norsk (eller anna skandinavisk språk)

Søkjarar med sterk fagleg bakgrunn i lingvistikk (eller nærliggjande fag) er velkomne til å søkje også utan omfattande laboratorieerfaring, dersom dei er motiverte for å byggje kompetanse i eksperimentelle metodar og kvantitative arbeidsmåtar.

Om prosjektet

MInDReading undersøkjer korleis erfaring med nærskylde språkvarietetar påverkar språkprosessering i sanntid ved lytting og lesing. Dette er særleg relevant ved bidialektisme, i møte med skilnader mellom dialekt og skriftspråksnorm og når ein bruker fleire skriftspråk (til dømes nynorsk og bokmål).

Prosjektet har tre hovudkomponentar: (i) utvikling og validering av eit føremålstenleg spørjeskjema for å kartleggje individuell multilektal erfaring (bruk av og eksponering for dialektar og skriftspråk), (ii) EEG-studiar som undersøkjer korleis regionalt varierande grammatiske mønster - både mellom dialektar og mellom dialekt og skriftspråk - blir handsama i hjernen ved avkoding av språk, og (iii) blikksporing ved lesing for å måle korleis dei same kontrastane og individuelle skilnader i dialekteksponering påverkar naturleg lesing.

Ved å samanlikne kontrollerte grammatiske skilnader mellom dialektområde og mellom munnleg og skriftleg språk, kartlegg MInDReading korleis språkforståing ved lytting og lesing blir påverka av snever, men systematisk variasjon innanfor eitt språk. Prosjektet kastar lys over korleis språkbrukarar handsamar konkurrerande mønster på tvers av modalitetar, og korleis språkbakgrunn og brukserfaring pregar forståingsprosessane.

Stillinga vil innebere periodiske forskingsopphald ved samarbeidande institusjonar (til dømes UiT - Noregs arktiske universitet, Universitetet i Oslo og/eller Universitetet i Bergen). Reising må påreknast.

Arbeidsoppgåver
Stipendiaten skal mellom anna:
• bidra til planlegging, gjennomføring og dokumentasjon av studiar i prosjektet
• rekruttere og teste deltakarar og gjennomføre praktisk laboratoriearbeid knytt til datainnsamling
• analysere og formidle resultat gjennom konferansebidrag og vitskaplege publikasjonar
• delta i prosjektmøte og samarbeidsaktivitetar med partnarinstitusjonar

Vi tilbyr
• ei fullfinansiert stipendiatstilling med nasjonalt samarbeid og brei metodisk profil
• eit engasjert fagmiljø og tilgang til relevant forskingsinfrastruktur
• høve til forskingsopphald ved leiande norske partnarinstitusjonar
• løn etter statens lønsregulativ, stillingskode 1017. Startløn ved Høgskulen i Volda er per i dag 550 800 kr per år (brutto), i tråd med hovudtariffavtalen. Det er lagt opp til jamn lønsutvikling i perioden.

Generell informasjon

Ved HVO er vi opptatt av mangfald. Medarbeidarar med ulik livserfaring vil gjere oss i stand til å finne gode løysingar på arbeidet vårt. Vi oppmodar difor alle til å søke stillinga utan omsyn til alder, kjønn, funksjonsevne eller etnisk bakgrunn. Du er også velkommen til å søke sjølv om du ikkje kan vise til ei samanhengande yrkeskarriere. Lokala er universelt utforma, og vi legg tilhøva til rette for personar med nedsett funksjonsevne.

Dersom du har nedsett funksjonsevne, innvandrarbakgrunn eller hol i CV kan du bli positivt særbehandla om du kryssar av for dette når du søker stillinga. Vi vil invitere minst éin kvalifisert søkar i kvar av desse gruppene til intervju. For å bli positivt særbehandla på denne måten, må du oppfylle visse krav. Les meir om dette på arbeidsgiverportalen (https://arbeidsgiver.difi.no/strategisk-hr-og-ledelse/inkluderingsdugnaden/hvordan-bli-en-mer-inkluderende-virksomhet).

Tilsetjing skjer på dei vilkåra som følgjer av lov om offentlege tenestemenn, regulativ, reglement og instruksar som til ei kvar tid gjeld for stillinga, mellom anna lovfesta innskot i Statens pensjonskasse.

Aktuelle kandidatar vert innkalla til intervju. Søkjarar som vert kalla inn til intervju, må ta med originalar av vitnemål og attestar for å dokumentere dei elektronisk innsende vedlegga.

Om søknaden

Alle som søker stillinga må søke digitalt gjennom rekrutteringsportalen Jobbnorge. Du må laste opp relevante vitnemål og attestar. Vi gjer merksam på at søknaden blir vurdert ut frå informasjon som ligg føre ved utløp av søknadsfristen. Det er viktig at du viser korleis din kompetanse fyller kriteria for stillinga

Offentleg søkarliste blir utarbeidd etter at søknadsfristen er ute. Dersom du ønsker å reservere deg frå oppføring på offentleg søkarliste, må dette grunngjevast i Jobbnorge. Du vil bli varsla om reservasjon ikkje blir tatt til følge.

Søknaden blir vurdert på grunnlag av dokumentasjon som er levert innan fristen via Jobbnorge. Legg ved:
• søknadsbrev
• motivasjonsnotat (1-2 sider) der søkjaren gjer greie for motivasjon og korleis eigen fagleg bakgrunn/kompetanse er relevant for MInDReading
• CV
• vitnemål og karakterutskrifter (alle gradene)
• kontaktinformasjon til 2-3 referansar
• ei skriveprøve (t.d. masteroppgåve, manus eller publisert artikkel)

Søknaden kan skrivast på engelsk eller eit skandinavisk språk.

Kontakt

For meir informasjon om stillinga kan du kontakte Jade Jørgen Michael Sandstedt, jade.jorgen.sandstedt@hivolda.no/+4770075298.

Studiebygda Volda

Midt mellom fjord og fjell på spektakulære Sunnmøre finn du Høgskulen i Volda, med sine lange tradisjonar.

Les meir på www.hivolda.no (http://www.hivolda.no)

Video: https://www.youtube.com/watch?v=wSlL1WkuUXc